Benitez vill skerpa sóknina

Rafael Benitez, knattspyrnustjóri Liverpool, er ánægður með leik sinna manna það sem af er leiktíðinni, en segist þó vilja skerpa á sóknarleik liðsins, sem hefur ekki verið upp á marga fiska í undanförnum leikjum. "Varnarleikur okkar hefur verið mjög góður upp á síðkastið, en við verðum að fara að skora mörk ef við ætlum okkur að ógna toppliðunum í vetur," sagði Benitez, sem hefur átt fullt í fangið með að verja ákvörðun félagsins um að kaupa ekki fyrrum leikmann liðsins, Michael Owen. "Ef við skorum þrjú mörk í næsta leik, verða allir búnir að gleyma þessu Owen-máli, ég er alveg viss um það. Í fótbolta er oft betra að bíða og sjá, heldur en að stökkva á eitthvað sem maður er ekki alveg viss um og ég er þess fullviss um að ég sé með nógu góða leikmenn í hópnum til að skora mörk," sagði Spánverjinn.