Raggi Bjarna sjötugur

Söngvarinn ástsæli, Ragnar Bjarnason, er sjötugur í dag og heldur um leið upp á hálfrar aldar söngafmæli. Hann segir þjóðina ekki vera að losna við sig og hann hætti ekki að syngja á meðan röddin ekki gefur sig. Ragnar Bjarnason þarf ekki að kynna fyrir þjóðinni, svo lengi hefur rödd hans hljómað í eyrum hennar. Það var ljóst strax á unglingsárum hvaða starf hann myndi leggja fyrir sig, enda er nú svo komið að hann heldur upp á 50 ára söngafmæli. Afmælisbarnið heldur upp á daginn í faðmi fjöldskyldunnar, en hann segir að dóttur sín ætli að halda veislu fyrir gamla manninn, en á laugardag verður söngveisla á Broadway. Raggi segir að þar verði allir sem koma að disknum sem út kemur í október og allir muni þar gleðjast með sér. Um 40 manns koma að nýju plötunni hans Ragnars, úrvalslið að hans sögn enda er hann alsæll með árangurinn. Það lítur reyndar út fyrir að uppselt verði á söngafmælið á laugardag og er því strax farið að tala um framhaldsafmæli 1. október og Ragnar segist til í það, því þrátt fyrir að vera orðinn sjötugur er hann ekkert að gefa eftir. Hann segir að það losni enginn við sig, enda hafi hann eins gaman af söngnum og fyrir 50 árum og á meðan guð gefi að hann haldi röddinni þá haldi hann áfram. Á löngum ferli, hefur ógrynni af lögum komið á hljómplötum með Ragnari og segir hann að í einna mestu uppáhaldi hjá sér sé lag pabba hans, „við bjóðum góða nótt", en einnig sé lag eins og „my way" í miklu uppáhaldi. Þá segist hann halda mikið upp á lag Gunnars Þórðarsonar, „ljúfa langa sumar", sem sé á disknum nýja.