Sér­sveitin bregst við „al­var­legu at­viki“ á Kárs­nesi

„Lögreglunni á höfuðborgarsvæðinu barst tilkynning um alvarlegt atvik í vesturbæ Kópavogs í hádeginu. Brugðist var hratt við og var lögreglan með mikinn viðbúnað í ljósi tilkynningarinnar,“ segir í tilkynningu frá lögreglunni. „Rannsókn málsins er á algjöru frumstigi og ekki er unnt að veita frekari upplýsingar að svo stöddu.“

Hildur Rún Björnsdóttir hjá lögreglunni á höfuðborgarsvæðinu hafði staðfest við Vísi að lögregluaðgerðin stæði enn yfir. Hún sagðist ekkert geta tjáð sig um málið, annað en að aðgerðin stæði yfir í húsabyggð á Kársnesi.

Helena Rós Sturludóttir, upplýsingafulltrúi Ríkislögreglustjóra, hefur staðfest við Vísi að sérsveitarmenn séu á staðnum. Varðstjóri slökkviliðsins segir við Vísi að tveir sjúkrabílar hafi verið sendir á vettvang að beiðni lögreglu.

Sjónarvottur segir að lögregluaðgerðin sé við Hafnarbraut. Búið er að girða af stórt svæði á Kársnesinu.

Á myndskeiði sem Vísir hefur undir höndum sést lögreglumaður leggja niður merkimiða — að því er virðist fyrir sönnunargagnsnúmer — á stigagangi á Kársnesi, þar sem lögreglan og sérsveit bregðast við „alvarlegu atviki“.

Fréttin verður uppfærð.